Deseñamos e maquetamos o teu libro electrónico -ebook-
Creamos os teus libros dixitais!
Somos unha empresa formada por distintos profesionais do sector editorial que levan no mundo do libro dende hai máis de 20 anos.
Conscientes de que ningún libro é igual a outro, connosco non terás ofertas chamativas que acaban en sorpresa. Nós valoramos o teu orixinal e ofrecémosche un presuposto individualizado e real, en base as características de cada obra.
O tempo de traballo para a maquetación dun libro non é o mesmo se o texto é corrido que para outro con imaxes, gráficos, ou con referencias e notas ao pé de páxina… na conversión e adaptación ao formato dixital pasa o mesmo. Se o que buscas é calidade e funcionalidade, non meros pdf, ofrecémosche un servizo profesional con revisións ata que o resultado final sexa o que se corresponde co teu orixinal.
Epub 2
Maquetación fluída
Son os ebook nos que a lectura é completamente variable. O lector pode adaptar a obra ás súas preferencias de cada momento, ampliando ou diminuíndo texto, imaxes e mesmo avanzando e retrocedendo nos enlaces. É o formato indicado para xéneros como a narrativa, a poesía, o teatro, o ensaio ou a investigación, posto que segundo o dispositivo e as preferencias, se reaxusta a visualización para facilitar a experiencia lectora.
Epub 3
Maquetación fixa
Son os ebook nos que a maqueta permanece invariable. Indicado para aqueles libros que deben manter intacta a maqueta, como son os álbumes ilustrados ou contos infantís nos que as imaxes forman parte intrínseca da obra e os cambios na visualización do texto afectarían ao fondo. Neste formato tamén entran os libros interactivos con vídeos, audios ou efectos pop-up, para unha experiencia multimedia.
Libro adaptable “responsive”
A gran vantaxe dos ebook reside na súa comodidade para a lectura, pois podes transportar numerosos títulos nun único aparato. Podes acceder á túa biblioteca persoal dende calquera dispositivo dixital, ben sexa ereader, ordenador, tablet, smartphone… por iso é importante que o traballo de adaptación da obra sexa profesional, porque se trata dun libro vivo que debe redimensionarse a cada formato facilitando a lectura e mantendo unha visualización correcta que permita unha mellor experiencia para o usuario.
Antes de presentarche un prezo, precisamos saber cal é o traballo que debemos realizar en cada proxecto. Por iso, solicitarémosche inicialmente unha mostra en pdf do libro en cuestión. As súas características influirán no importe económico, pois como dicíamos, gráficos, fotografías, táboas, ilustracións, pés de páxina, referencias, e mesmo o número de páxinas, proporciónanos un achegamento ao tempo de traballo que imos precisar e, así, poder ofrecerche un presuposto o máis real posible.
Unha vez aprobado o orzamento, o material que solicitaremos é a maqueta orixinal “empaquetada” cos vínculos correspondentes. Nós encargarémonos de todo o proceso de conversión e adaptación a formato epub2 (maquetación fluída) ou epub3 (maquetación fixa).
Acostumamos a traballar con maquetas de Indesign como orixe para despois pasar ao programa editor epub. Outra opción tamén podería ser QuarkXPress, pero para todos os casos proporcionándonos o pdf do orixinal para comprobar en todo momento que o resultado final se corresponde co establecido.
Outros formatos de orixe, como word ou o propio pdf, somos reacios a utilizalos porque requiren de moitas máis horas de traballo para acadar o resultado final, polo que se incrementa considerablemente o coste para o cliente. Nestes formatos, ao trasladar o orixinal ao programa de edición establécense variacións nos fluxos de texto, particións, saltos de liña… mesmo os encabezados e pés de páxina poden autoinsertarse no propio corpo de texto, implicando un traballo extra de revisión pormenorizada de comprobación liña a liña, tanto pola nosa banda como pola do cliente.